U pueta sempre francu
Dice ciò ch’ellu risente
Eppò qualchi volta ancu
Si ne piglia à lu putente
Incu a penna mai stancu
A so voce face sente.

O ghjente di cursichella
Incu a rima à lu mo tornu
Parlavi vogliu una stundarella
Di lu maladettu fornu
Ch’elli ci volenu impone
Pè attuscà ghjente è rughjone.
Per sbarazzassi di u mulizzu
Che no femu oghje assai
Volenu fà un sciucchizzu
Chi ci pò mette indu i guai
In brusgendu notte é ghjornu
A rubaccia ind’un fornu.

U chjamanu incinneratore
In lingaghju mudernu
Ma induve lu so fume corre
Manda tuttu à caternu
E di l’isulella fiore
Ne pò fà tandu un infernu.

Facenu li so belli discorsi
Puliticanti cu falsi sapienti
Dicendu sintite o corsi
Noi simu cumpitenti
Dendusi un colpu di manu
Da u malignu à u ciarlatanu.

Per Chernobyl mi ramentu
Listessu era lu discorsu
E ava quande li sentu
Più grande hè lu mo rimorsu
D’ave cridutu certi fiati
Causa di tanti malati.

Ghjocanu incu à salute
Di li nostri più cari
E si e lingue stanu mute
Saranu mumenti amari
Dunque l’ore sò vinute
Di difende i nostri affari.

Carne, brocciù incu casgiù _ Urtaglia, mele è farina
Tandu avaranu l’asgiù
Sarà la nostra ruina
E mancu più li turisti
Ci vinaranu l’istatina.

A quelli di lu cumandu
Li adirrizzu una prichera
E ad elli m’arricumandu
Di sceglie l’altra manera
Quella chi un sparghje vilenu
E nulla brusgia à fornu pienu.

A l’amichi di u cullettivu
Li vogliu lampa lu fiore
Pé avè dettu à lu gattivu
Chi vole l’incinneratore
Chi di pace sarà privu
S’ellu un lascia micca corre.

Li marchjaremu à fiancu
Per dalli forza è putenza
Inc’un core tamentu
Chi pigliatu avemu cuscenza
Di u piriculu maiò
E cun’elli dimu innò.